تأثير المهن الحساسة في العراق على النفس وكيف يؤثر ذلك على الأطفال

تعرفون أحنا بوجودنا بالعراق فكرة أن حرامية أو سلابه ممكن يدخلون للبيت واردة جدا بأي بيت عراقي, السؤال هنا لو فاتوا فديوم سلابه, شنو هو قرارك؟ هل رح تنـ🍑ـح الهم؟ لو تهجم عليهم بنية القتـ🔪ـل دفاعا عن النفس وممكن يجطلـ⚰️ـوك؟ واذا جاوبت الثانية هل مستعد توصل لمستوى تقتل انسان؟ هل أنت أساسا مهيئ نفسياً انك تخطوا هيج خطوة بصفتك "رجال" البيت؟

من وقتها بصغري وأني ابحث عن الموضوع هل أني حصير رجال مثل هذولة اللي يضرب اللي كَدامه بدون تفكير او خوف من العواقب لو لا, وماكان ألا وثائقيات الجرائم الجنائية أو التجمعات السرية تجاوبني بل اكو امور مخيفة الواحد يعرفها وهي موضوعنا اليوم, طلع بالمجتمع أحنا عدنا ناس كثير "مرشحين" انهم يكونون من امهر القتلة أهمهم الكَصاب (الجزار), الكَصاب العراقي تحديداً يعيش ويه ألغنمه من بدايتها ك شبل صغير إلى أن يكطَعها قطعة قطعة, ومع الوقت والعمر, تشوف الكَصابين بدوا يستمتعون بالموضوع وصار عدهم شغف وحب بالمهنة مثل اي شيء ثاني, اكو فيديوهات كثيرة لكصابين يشرحلك عن اجزاء بجسم الحيوان او تحديدا سوالف التيكتوك مال يلعب ويضحك ويه اللحمة من يكَلك هذه امتع شيء الي اكصكصها او اذبحها, احنا دنتقبلها لان مادنفكر بالموضوع على انها فعلا روح وجثة ل حيوان ديقتله هذا ومتلذذ لكن بصراحة, أني چنت اخاف منهم هذولة بعد ماقريت هالمواضيع بصغري, خصوصا اللي بالعراق, تعرف ليش؟ لان اللي بالخارج اكو ألف من يراقبهم واكو ألف من يشرف عليهم لكن بالعراق تعرف منو الوحيد اللي واكف فوكاَهم؟ بالضبط الأله فقط, اللي موكَف هالجزار انه ما يقتل "فقط الأله" ماكو اي رقابة او سبيل يعرف احد هالجزار اللحمة اللي ديبيعها اليوم لبشر لو لحيوان او لمنو...

طيب رح تكلي لك بابا اكو فرق جذري بالموضوع مستحيل نفس الشيء لان الإنسان ما متعود على مشهد البشر المقتول بينما الحيوان المجتمع نفسه يدعمه نفسياَ على ذبحه الحيوان لهذا الجزار يحس براحة او متعة لما يقتل عادي انت اللي مازم الموضوع وصاير من جماعة حقوق الحيوان أكل واسكت 😡...

أوك اجي وياك شوية شوية... هل هذا الكلام يمشي على شعب مر بحروب أهلية وحروب داخلية مثل داعش؟ هل القروي اللي تعلم مهنة القصابة من اهله وعمامة بالوراثة هذا يعرف نفسه لما يحتاج لدعم نفسي؟ خصوصاً لما يكون اكو تشجيع على قتل الإنسان نفسه بشرط ان يكون مخالف للجماعة؟ كمثال بأزمة داعش كان اكو تشجيع كارثي للقتل والتمثيل بجثث الدواعش رداً على الشيء نفسه اللي سووه الدواعش بجثث العراقيين؟

طيب السؤال اللي كان يدور بالي دائما, ليييييييييييش لما تصير هالمشاهد مال التمثيل بالجثث يمنعونة من مشاهدتها؟ جواب هالسؤال هو بداية المصيبة, أن البشر بمشاهدة هالعنف رح يمرون ب 5 مراحل تترك اثر عليهم بدرجات مختلفة

• التأثير النفسي العاطفي
• التأثير التشبع بالعنف
• التأثير بالسلوك
• التاثير بالنوم والكوابيس
• التاثير بالقلق والتوتر

أنت ما ينصح ان تشاهد هالعنف, لأنك رح تمر بهذه المراحل فوكَ, لكن اصحاب المهن الحساسة همه فعلًا مارين بعدد من هذه المراحل خلال مهنتهم اليومية واذا كانو "بالفطرة" همه بالمهن مالتهم مثل الكَصاب اللي من هو طفل ابوه وجده الوارثين المهنة ماخذيهم وياه من بداية تكونه يروح يشوف ذبح الحيوانات ويذبح بنفسه ويتشجع من المجتمع نفسه انه يذبح افضل وهنا هي المشكلة الأكبر ان هالمراحل الخمسة فوكَ تأثر على الأطفال اكثر من كبار السن, لان الطفل يكون عقله ببداية نموه او بناء نفسه بناء سلوكه بناء عاطفته بهالمجتمع

دربالك تفكر وتكَلي الطبيب وجماعة التشريح نفس الشيء 🥴 اكو فرق جذري بين شخص متعلم ودخل المجال بمرحلة عمرية يكون بيها بالغ وتحت اشرف وبين مهنة عشوائية يكون الطفل ببداية عمره يلزموه سچين ويكلوله يلة اذبح وكَص واكَطع... رح اذكرلك حادثتي ويه احد الامثلة اللي خلتني اكتب عن هالموضوع اساساً...

لفضولي بالموضوع بنفس السنة صدف اني رافقة كَصاب بمنطقة مجاورة ألنه كان يعمل ويه أخوانه الكبار اللي وارثينه المهنة من جدهم اللي مورثها لابوهم ثم لابنائهم وهو اخر العنقود بين اخوانه ديعلموه على الدرب من نعومة اظافره, كان شاب ببدايته بعمري م94 وهو عز الطلب كان, هيج شباب بعمري دائما يطمحون انهم يتباهون بانجازاتهم وهذا كان يغذيني بمعلومات ما الكَاها حتى بالدارك ويب, بوقتها كانت أزمة داعش واذا تذكرون بالكهاوي موضوع التمثيل بالجثث وتناقل محتواها بيننا بالكهاوي شيء عادي بوقتها وهو "صدف" انه يملك العدد الأكبر من فيديوهات "لآهتمامه" بالموضوع… ومن وقتها أني عرفت وصرت اشوف بنفسي تأثير المهنة عالبشر ممكن يكون خطر خصوصا بالعراق الضايع, ببساطة الدافع النفسي للكَصاب انه يقتل البشر هو دافع الهي اجتماعي فقط, أي أنها العاطفة لا اكثر, مثلما أحنا نملك عاطفة هسه على الحيوانات المعينة مثل كلاب وقطط الزينة وننقرف لَمَّا نشوف الاسيوين يقتلوهن, وهم تماما لما الهنود يشوفونا نقتل بقراتهم, الدافع العاطفي المشاعر اللي نملكها لهل كائنات والارواح هذا هو النقطة الوحيدة اللي تمنع الكَصاب من انه يقتل البشر

طيب يلة الحمدلله انت ذكرت 5 نقاط تاثيرات بيها احنا نسينا أن السلوك اله دخل همين مادام الكَصاب مؤمن بالله ويخاف ان اكو قوة خفية رح تعاقبه ف من الطبيعي ميسوي هيج... طيب شنو هو الشيء اللي دول تمنعه منعاً باتا لانه رح يسبب بالخروج عن السلوك الطبيعي للبشر وتفقدهم للعاطفة؟

بالضبط أحسنت 💊 المخدرات, لهذا اي واحد مشرف على جريمة يتخذ من المخدرات وسيلة لتهدئة نفسه, لأنها تخلي عقلك يبطل شوية يستنيچ ويشغل نفسه ويفكر باللي أنت متعود عليه دون وجود الIF-Else مو اني اللي اشرحلك عن المخدرات ف ابحث عنها بنفسك لكن المختصر ان هو هذا اساسا الشيء اللي عرفني بهالكصاب بوقتها كان جاي لمنطقتنا حتى يشتري حبوب مشتهرة بالعراق لسهولة توفرها اسمها ترامادول من الصيدلي مال منطقتنا اللي معروف انه يبيع حبوب بدون راجيتات للشباب وهذا موضوع ثاني حاجين عنه..

الفكرة أن هالكَصاب اجتمعت كل الظروف اللي تخلي ميكون عنده 1% تردد من إمكانيته بذبح البشر... خصوصاً انه المجتمع ألهوا بيه أعطاه كل اللي يريده:

• - تربة هو وصغير بالتدريب على قتل الروح والتعايش وياها قبل ذبحها, كان يلعب ويه الغنم الصبح ويذبحهم بليل.
• - كبر بمجتمع علمه ان الرجل القوي هو اللي عنده عضلات وجراءة وسبع ومايفكر مرتين لما احد يندكَ بيه خصوصا بالعركات.
• - انطاه المجتمع الشيء اللي محتاج له حتى يساعده بالتخلص من التاثيرات السلوكية والعاطفية (حبوب المخدرات)
• - انطاه المجتمع الدافع الاخير اللي يخليه يرتكب الجريمة وهي نية القتل والتشجيع لها مثل ازمة داعش
• - انطاه المجتمع اهم شغلة يحتاجها اي قاتل وهي الانتماء لجماعة تؤيد افعالك وفعلاً اخوانه كانو معروفين انهم من جماعة العصائب (جماعات مسلحة اي كان هدفها, العصائب مايفرقون عن داعش الاثنين يعرفون يقتلون الفرق ان مصالح الاثنين مختلفة)

هذا الشخص كان يخوفني مستقبله اكثر ما اشوف الضابط الفرخ او جماعة الاستخبارات اللي يفرشون نفسهم, بوقتها احنا اهل المحلات كان الضباط ماكلين راسنا دوريات والمجتمع جان مايحترمهم بنعال لان جان نص العراق واكَع وهمه ماكَادرين بس على المدنين بالعاصمة ويجمعون بهالرشاوي... كنت احس بيه للكَصاب انه خطر اكثر من الميليشات نفسهم, هذا واللي مثله واللي مروا بنفس ظروفة واني متاكد كثير اكو همه افضل اداة للقتل والذبح وما استبعد ابدا انهم يكونون ولو مرة مجربين مو يقتلون لان صارت قديمة سالفة القتل بل ياكلون لحم البشر بسبب هوسهم بانواع اللحم, لان بوقتها لما چنة نفتح مواضيع داعش كان هو الاكثر اهتماما بطريقة الانتقام منهم واستخدام مفردات القصابة اللي مختصة بالكشف عن اجزاء الذبيحة الاطيب اللي هي نفسها يملكها الانسان...

وهنا رح نسال موضوع ثاني, هو سالفة اكلي لحوم البشر صدكَ لو جذب ؟ وهل فعلاً لحم البشر مايختلف عن اي لحم ثاني غير بخصائصه ؟

هنا لما تبحث رح تعرف اننا متاخرين جداً بهلسؤال اكلي لحوم البشر فعلياً موجودين بكل زمان, بل الاسوء اكو اعتقادات ان أكل لحوم البشر النظيفين اصحاب الجينات الجيدة مفيد للبشر نفسهم وهو الشيء اللي يتداوله كثير من افلام الرعب ان عساس اكو اثرياء بالعالم يشترون الناس او جثثهم البشرية الشبابية اللي كانوا يملكون صحة جيدة وخالين من الامراض بهدف اكلهم ك اطباق مميزة...

بل الاسوء طلع اكو ديانة وطقس فعلي بافريقيا اسمه "الكانيبالية الطقسية" هذا يتم من خلاله التضحية بالبشر واكلهم تماما نفس سالفة الاضحية للاله مثل العيد لما تذبحون اضحية للاله بالاسلام, والدارك اكثر ان لما تقراء قوانين واخلاقيات حظر اللحوم هذه كاتبيلك ان هذه اللحوم خطرة للانسان لان ممكن تنقل امراض للبشر 😮 يعني همه ماكدين بشكل فعلي اذا كان الانسان هذا نظيف ومايملك امراض رح يكون اكلة مفيد مثله مثل الحيوانات؟؟؟ وهذا اللي خله كاتب انمي اتتاك اون تيتان بان اللي يريد يملك قوة عملاق اخر بالقصة لازم ياكل جثته او تحديداً النخاع الشوكي للشخص هذا🥴 ويا محاسن الصدف ان جسم العملاق نفس جسم الانسان بدون جلد...

رح تفهم انت من هالجريدة مال اليوم 3 امور:

• - الكَصاب مايفرق اي شيء عن بقية المهن الحساسة مثل التشريح والطب كلهم بحاجة لمتابعة وعلاج نفسي عند الحاجة اهمهم الكصاب.
• - سبب اخر يخليك تترك العراق, بلد غير امن ومتخلف وماعنده ذرة امان بل بيه كل الظروف اللي تخلي القاتل والسفاح ينولد بهالمجتمع.
• - انت عندك تاثيرات اما تطلع عليهن وتججاوزهن وتلكالهن حل او تخليها لليوم اللي رح تواجه بيه صدمة نفسية وتعتمد بوقتها على قوة الاله الخفية تساعدك.

اما اذا مهتم بتفاصيل اكثر بشكل علمي مجموع بالعربية اقراء كتاب اسمه صوت الأعماق / عادل مصطفى أما اذا تريد يكون الموضوع بشكل طريف بدون اهتمام زايد بالموضوع ف بخصوص لحم البشر كل ماعليك تابع انمي اسمه نيفيرلاند

هالانمي يتحدث عن قلب الامور ووضع نفس الدوافع اللي يستخدمها الانسان بقتل الحيوان لكن رح يستخدمها كائن اسمى واقوى من الانسان مسيطر عليه بهالانمي والانسان رح يكون الوجبة الالذ لهذا الكائن وتشوف بوقتها الاطفال والكبار ديتم تربيتهم بمزارع بهدف ذبحهم واكلهم. واطيب وجبة تكون للكائن الاسمى هي مخ الانسان وكل ماكان الانسان ذكي رح يعلى سعره وقيمته لهل ذبيحة.

Yakusoku no Neverland (Anime TV 2021)

* Based on a manga series written by Shirai Kaiu and illustrated by Demizu Posuka.Freedom is Beautiful, but Brutal.Fifteen child

Nskha

ملاحظة مهمة: فتحنا لهل موضوع ما يعني اني داكلك صير نباتي, النباتيين همه الاشخاص اللي اثرت عليهم الظروف الخمسة فوكَ واتخذوا من نفسهم ضحية لهل حياة القاسية عكس أكلي اللحوم تماماً واختارو المجازفة بحياتهم لكن افعالهم ما تتعارض ويه قوانين المجتمع الدولي اللي احنا بيه لكن بالنسبة الي اكلي لحوم البشر, والفيجانز يملكون نفس الشذوذ بنظري الفرق انهم باتجاهات مختلفة لا اكثر. بل يمكن بالمستقبل نسمع تبريرات لاكلي لحوم البشر بحجة الكثافة السكانية وان الاموات خلص مجرد جثث تماما مثل ما دنسمع تبريرات ل اغتصاب الاطفال والبيدوفيليا, عالم قاسي صح ؟ تذكر دائما ان اكو غبي بعده يريد يتزوج ويخلف ابنه بهالمجتمع بين تبريرات اننا دنقتل حيوانات بريئة في سبيل نعيش وبين ان اكو ناس رح يجي يوم وممكن يكون ابنك وجبتهم