شلون تشتري رقم التيليكَرام الانونيموس الجديد؟ لحكَ عالسريع, كل اللي محتاج تعرفه هنا.
لكثرة السؤال هذا شرح مبسط شلون تشتري الرقم مال تيليكَرام الدنحچي عنه بـقناة التلي, ركز مثل مكَلنا سابقاً هو اسمه التجاري Anonymous Number بس بالحقيقة هو يعتبر FAKE Number عبارة عن رقم وهمي تكَدر من خلاله بشكل لا مركزي تسجل بحساب تيليكَرام خلي بشكل مبسط اشرحلك شنو فكرته حتى تفهم قبل لتشتري..
هسه انت بالشكل الطبيعي باي تطبيق مراسلة عندك خيارين اما تسجل ب بريد الكتروني (ايميل) او من خلال رقم هاتف محلي (سمكارت موبايل) او البعض من مهتمين الخصوصية يستخدمون بدل سمكارت الموبايل رقم الكتروني اسمه VoIP Number ناشرلكم عنه سابقاً هواية... لكن فكرة تيليكَرام الجديدة هنا هو يابة احنا ليش جاي نخلي المستخدم ركَبته بيد شركات الاتصال او الاطراف الثالثة ؟ ليش ما نخترعله حل لا مركزي يكَدر من خلاله يسجل بحساب التيليكرام بكل خصوصية اضافة الى انه يكَدر باي بقعة بالعالم يسجل لحسابه بنفسه دون اي وسيلة ثالثة مثل الرمز الاجباري اللي يجي على رقم شركة الاتصال ؟
وهنا تيليكَرام كَالت يابة مادام احنا اصلاً عدنا نظام البلوكتشين وعدنا عملتنا ونحب مستخدمينا الحلوين ونجحت ويانة سالفة اليوزرات بيع وشراء ف ليش مانضيفلهم سالفة الرقم لان رح يستفادون هواية امور اهمها:
- المستخدم رح يأمن ان حسابه صار ملكيته الخاصة لمدى الحياة دون الخوف من خسارة الرقم اللي رح توكَفه شركة الاتصال
- مارح ياكل هم بالسفر او الانتقال ان سيمكارت مالته يوكَف او رقم يتهكر او جهازه يتقرصن او رقم يناخذ لان ممعبي رصيد لان هالرقم هو مخصص للتلكرام وبس ومابيه اي وصول ثاني
- رخيص ويظل يمه لمدى الحياة ويضمن ان ملفاته اللي بالتلكرام وخصوصياته صارت بامان
- مايخاف من مشاركة رقمه, يكَدر يشارك رقم تيليكرام الفيك عادي ويراسلوه ناس عالرقم لكن محد رح يعرف رقمه الحقيقي كون رقم تيليكرام الفيك صح يسجل بيه دخول وكلشي مثل رقم العادي لكن هذا رقم وهمي مابيه اي امكانية اتصال او استلام سبام او مشاكل..
بالمناسبة تيليكَرام اعلنت ان الارقام المتوفرة حاليا هي 10 مليون رقم فقط ومامعروف شوكت الوجبة القادمة تكون بالاضافة الى ان سعر الارقام هاي رح يرتفع بيوم 13/12/2022 يعني بعدكم يوم (من 9 TON الى 90 TON ) ارتفاع بالسعر كارثي حيصير حوالي 10 اضعاف لهذا همه نشروا تحذير باستغلال الفرصة, يعني تكَدر هسه تحصل الرقم ب فلس ونص (~17$) مقارنة بسعره اللي حيصير بعد كم يوم اللي هو حوالي (~162$).
شلون تشتري الرقم مال تيليجرام ؟
كل اللي عليك انك تشتري باي طريقة كانت عملة ستيبل كوين اسمها Tether USD او أختصارها المعروف هو USDT هذه عملة رقمية بديلة للدولار بعالم الكربتو من خلالها يكَدرون ناس يتداولون قيمة فلوسهم بالدولار مع بقية العملات.. وهنا انت لعبة حتسويها انك تشتري بوسيلة الدفع المحلية مالتك اللي هي العراقية المفروض عملة USDT من خلال منصات اما بينانس او اوكيكس لكن نصيحتنا هنا استخدم OKX لان من خلالها رح تكَدر مباشرتاً بعد متشتري الUSDT تشتري من خلال الUSDT عملة التون مال تيليجرام.
تذكر لما تشتري التيثر من خلال الاوكيكس رح تشوف ان للاسف سعر الشراء بيه قط كله 1500 وفوكَ للدولار هالشيء بسبب انك بالعراق ياعزيزي والقط مسموح وماكو سيطرة على سعر البيع والشراء ف مستقبلاً او اذا لكيت صديق خارج المنصة يبيعلك التيثر ف رح يكون ارخص من هذولة الحرامية بهواية, لكن مادام احنا مجبورين هسه ومبلغنا بسيط ف امشي عليهم ك حل اضطراري..
هسه حتى تعرف شتسوي من الروابط مباشرة كالتالي:
لما تدخل عالرابط اعلاه بتحويل التيثر للتون اختار قسم الماركيت من ثم حدد كل فلوس تيثر العندك او حدد شكد تريد تحول من ثم دوس شراء تون بفلوسك التيثر ورح يتم الموضوع بنفس اللحظة ويشتري بسعر السوك وتنزل عملات تون يمك.
- من هنا تنصب تطبيق اسمه TonKeeper هذا اللي رح تشتري من خلاله وهمين تحفظ الارقام بداخله كـNFT.
بعد ماتنصب التون كيبر وتسوي انشاء محفظة تروح على الاوكيكس هسه وتنقل العملات التون اللي اشتريتهن لهاي محفظة. تذكر شغلة دربالك ثم دربالك ثم دربالك تنسى الـ22 كلمة اللي طلعن لك لما دتسوي محفظة التون كيبر لان هذني ال22 كلمة هنه مفتاح فك تشفير محفظتك في حال ضياعها او تسجل بيها من جديد واي واحد يملك هاي كلمات ممكن يسرق محفظتك.
من هنا تكَدر تنقل بشكل مباشر عملاتك التون الى محفظتك التون كيبر (استخدم خيار Withdraw)
- من هنا تشتري رقم عشوائي من تيليكَرام بسعر 9 تون (رح يرتفع قريباً)
-1 بالخطوة الاولى بالصورة اعلاه تربط المحفظة مالتك مال TonKeeper
-2 بالزر الازرق رح تكدر تشتري رقم تيليكرام عشوائي بسعر 9 تون فقط.
-3 بعد ما تدوس عالشراء رح تظهر لك عبارة عن شاشة QR Code تطلب منك تفتح تطبيق تون كيبر بجهازك وتمسح الكود كيو ار بالشاشة ظاهر لك اول ما تمسح الكود رح يظهر يمك ان محفظة مالتك تريد تدفع 9 عملات مقابل شراء الNFT مال رقم تيليكرام
-4 مجرد ان تدفع وتدوس موافق رح يكَطع منك فلوس وتستلم بعدها بثواني رقم تلفون و NFT بجهازك بالتطبيق
من هنا رح تكَدر تدير الارقام الـNFTs اللي اشتريتهن من خلال تيليكرام فراكَمينت واللي محفوظات بمحفظتك المربوطة بالمنصة
وهسه يا عزيزي التيليكَرامي مبروك عليك رقم الفيك هذا تكَدر هسه تروح تسجل بالتلي او تبدل رقم وتدوس Get Code ورح تحصل رمز اللي جان مفروض يوصل للسمكارت وخلص حسابك صار ملكك بدون اي وسيط محلي ك شبكة موبايل.
تذكر كلش زين هذا الرقم مخزن ك NFT بالمحفظة مال TonKeeper اذا ضيعت المحفظة ف يضيع عليك رقمك همين والمحفظة رح تضيعها مو بخسارة الجهاز بل لما تنسى ال22 كلمة اللي طلعن لك وكالولك احفظهن بمكان امن لان هنه ذنيج المحفظة مالتك الحقيقية وكل من يملكها رح يملك هالارقام ف دربالك عليها زين اني بالنسبة الي حافظ الCrypto Pharses ذني ببرنامج يخزن رموز اسمه KeepSecurity انت بكيفك حير بنفسك وين تخزنهن بمكان أمن.
seo.call-to-action.title
seo.call-to-action.money-back
seo.call-to-action.message
هل أكدر بيع الرقم مستقبلاً ؟
اي الرقم مخزن ك NFT تكَدر تنقل الـNFT لأي شخص ثاني وبهالحالة من يسجل بالفراكَمينت رح يطلع رقم انه ملكه يمه
اذا اني عندي Hushed تنصحني اخذ هذا ؟
الاثنين منتجين ملهن دخل ببعض الهشد هو رقم فيرچوال اما هذا رقم فيك فقط للتلكَرام اذا هدفك من الموضوع الخصوصية ف هشد كلش كافي يمك, اما اذا خايف زيادة عن اللزوم على حسابك التيليكَرام ف اكيد الرقم الخاص بيهم اامن لك ك شي اضافي
